اخبار العرب من المحيط للخليج اخبار العرب من المحيط للخليج
[ad_1]
شرح أمير مرتضى منصور، المشرف العام على فريق الكرة بالزمالك، كيفية استغلال خروج المنتخب من أمم أفريقيا، مرشحًا 11 شخصية لإدارة اتحاد الكرة بعد الاستقالة التي تقدم بها هاني أبوريدة رئيس الجبلاية وأعضاء المجلس.
وودع المنتخب المصري مسابقة كأس الأمم الإفريقية من دور الـ 16 بعد الهزيمة أمام جنوب إفريقيا بهدف نظيف، في البطولة التي تنظمها مصر حاليا.
وجاءت تغريدات أمير مرتضى على تويتر كالتالي:
“ممكن نستغل الخروج المهين من البطولة إننا نبني منظومة قوية لإدارة الكرة في مصر في العشر سنوات القادمة.. السؤال الأهم من مين هم رئيس واعضاء الاتحاد القادم.. درسوا ايه وفين.. ممكن نجيب ناس مش مشهورة بس عندهم علم.. والله العظيم مش لازم اللي يشتغل في الكرة يكون لعب كرة، فرصة نصلح.”
“مين اللي بيختار اتحاد الكرة اصلاً!! مراكز الشباب وأندية الدرجة الثانية والثالثة ليهم صوت زي الزمالك والأهلي والإسماعيلي والمصري والاتحاد، بالتالي سهل الحصول على أصواتهم في الانتخابات!! لازم تتحط معايير عادلة لمين اللي ليهم حق انتخاب اتحاد الكرة.”
“مواصفات عضو مجلس ادارة اتحاد الكرة المصري؟ شرط أن يكون لاعب كرة سابق مقيد بسجلات الاتحاد كلاعب سابق أو شغل منصب عضو مجلس إدارة أي نادي!! ودي طبعاً كارثة، يعني لو واحد مصري درس في الفيفا أو أكبر جامعة رياضية في العالم واشتغل في برشلونة لا يحق له الترشح لمنصب في اتحاد الكرة المصري.”
“مؤهلات رئيس وعضو مجلس ادارة الاتحاد؟ معظم نجوم الكرة في العالم مؤهلاتهم الدراسية ضعيفة، فا مش بالضرورة إنك كنت لاعب نجم وموهوب في الزمالك أو الأهلي أو يوفنتوس حتى إنك تكون موهوب في الإدارة، لازم أي حد يترشح يكون حصل على دراسات حقيقية من الاتحاد الانجليزي او الاسباني مثلاً قانون.”
“وظيفة عضو مجلس ادارة اتحاد الكرة؟ لا يصح لعضو مجلس ادارة اتحاد الكرة انه يكون دخله من اي شيء متعلق بكرة القدم، عايز تكون في اتحاد الكرة مينفعش تكون مذيع رياضي او مقدم برنامج او صحفي رياضي او محلل او مدرب ده تضارب مصالح، نائب رئيس الاتحاد الاسباني مش بيقدم برنامج كرة في اسبانيا!!”
“قوة المنتخب راجعة لقوة المسابقة المحلية! يعني لو الدوري قوي ومنتظم وليه معايير ثابتة هيفرز لاعيبة على مستوى جيد جزء منهم هيحترف والباقي هيفضل يلعب في مسابقة محلية محترمة زي جيل 2006 و2008 اللي كان معظم قوامه من محللين، مش معناه عن رضايا عن الدوري وقتها كنظام بس كان بيفرز مواهب.”
“الكرة لعبة جماهيرية، مع احترامي لأندية الشركات والمؤسسات وأندية رجال الاعمال، يجب تقنين الاوضاع، اللاعب اللي اتربى في نادي معندوش جماهير لا يصلح ان يكون لاعب دولي يتحمل الضغط، باستثناء صلاح، النادي اللي معندوش استاد يتملى بالمشجعين يروح يلعب في دوري الشركات.”
“وضع نظام يجبر المستثمرين انه بدل ما يعمل نادي انه يشتري أسهم في اندية جماهيرية محتاجة تطوير، زي المنصورة والشرقية وطنطا وأسوان وغيرهم، يعني مثلاً شركة انبي ترغب في الاستثمار الرياضي تنزل راعي لفريق السويس وتمتلك اسهم في النادي واللاعيبة وهتكسب فلوس.”
“لازم نشوف مدرسة في كرة القدم نعمل معاها تؤامة حقيقية لازم يكون لينا هوية ومرجعية تناسب امكانيتنا ونبعت مدربين واداريين البرازيل والارجنتين وهولندا وألمانيا وإنجلترا وننقل التفاصيل لمصر ومعايشات ودورات حقيقية مش الدورات اللي بتتاخد زي رخصة القيادة وانت قاعد في البيت.”
“لازم دخل اتحاد الكرة من البث الفضائي والرعاة يتصرف على حاجتين، تطوير الموظفين بالمنظومة وعلى الاندية، يعني مكافأة الدوري المصري لا تقل عن 150 مليون جنيه والنادي اللي يصعد للمتاز يحصل على 25 مليون جنيه، مثلاً لو المصري او الاتحاد خد الدوري مش هيبيع لاعيبته وهيفضل ينافس لسنوات.”
“الكرة وكيفية ادارتها اصبحت صناعة واستثمار وعلم، لما نبطل نختار من برة دائرة الكابتن والحاج والبشمهندس والأعلامي والألقاب اللي ملهاش اي علاقة بكرة القدم هنتطور، مش معنى انك كنت نجم وموهوب في كرة القدم انك هتبقى نجم وموهوب في الادارة او التدريب لازم تتعب و تتعلم من الصفر.”
“خلاصة الموضوع في ناس كويسة تعبت واجتهدت في اتحاد الكرة وفي ناس فاسدة او جاهلة دورت على مصالحها مش لازم نهدم المعبد على اللي فيه.. نستفيد ونطهر ونغير دخلوا شباب مثقف ودارس مع الخبرات الموجودة وهيكسروا الدنيا، إنفانتينو رئيس الاتحاد الدولي محامي 49 سنة وملعبش كرة بس درسها.”
“محمد فضل وميدو وحازم امام واحمد عبدالله وهيثم فاروق ويحيى نبيل ومحمد زيدان وحسام غالي وعماد متعب واحمد حسن ومحمد شوقي وغيرهم كوادر عندهم مقومات يديروا الكرة في مصر بشرط ان يتم إعدادهم بشكل علمي يسافروا ويذاكروا ويتعلموا، لكن كفاية الأسماء اللي مبتتغيرش من 20 سنة.”
Source link
